الإندومي أو أي شعرية سريعة التحضير هي وجبة فقيرة جدا في القيمة الغذائية.
- وده لأنها بتحتوي علي نسبة قليلة جدا من الألياف والفيتامينات والبروتين والأملاح المعدنية.
- واكتر مكون فيها هو الكربوهيدرات، والقمح المستخدم فيها هو نفس قمح المكرونة "قمح الديورم"
- يعني هو عجينة قمح عادية جدا.
- وفيها مكسبات طعم، يعني مبيتحطش عليها فراخ بجد او لحمة بجد او خضار بجد.
هل ينفع الطفل يعيش عليه كل يوم؟
لا لأن الكربوهيدرات اللي فيه هتديه احساس بالشبع وبالتالي لما تيجي الوجبة الاساسية واللي اكيد هيكون فيها بروتين والياف وفيتامينات اكتر من الاندومي فهيمتنع عنها، ولو الاندومي وجبة اساسية للطفل كل يوم فده هيخلي عنده سوء تغذية ونقص ف العناصر.
هل الإندومي مسرطن؟
علشان اقدر اقول ان المادة دي مسرطنة فلازم تكون المادة دي اثرت علي الDNA او الحمض النووي بتاع الخلايا بتاعتنا وغيرت في جيناتنا، ولكن مفيش ابحاث علمية قالت كده .
اكتر مادة عليها كلام هي الجلوتامات أحادي الصوديوم او "Monosodium glutamate" أو "E621" ودي مادة معززة للنكهة يعني بتدينا احساس اكتر بالطعم، وبرده لم يثبت علميا ان ليها تأثير علينا، ولكن في ناس بيجيلهم حساسية م المادة دي ومن بعض أعراضها حكة في الجلد او شعور بالغثيان أو صداع وتنميل وغيره من الأعراض واللي غالبا بتختفي بعدها بساعتين.
كمان المادة دي مش موجودة في الاندومي بس، دي موجودة كمان في المرقة واللحوم المصنعة وبتدخل في تركيب التوابل الجاهزة زي بهارات الفراخ او اللحمة او الكبسة، وموجودة بشكل طبيعي في الطماطم والجبن
كمان معظم المطاعم بتستخدم المادة دي علشان كده الأم مهما عملت أكل في البيت فمبيكونش زي الأكل اللي برا للأسف.
ممكن لو الطفل الصغير او الكبير اللي عنده ٢٥ سنة ومش راضي يسيب الأندومي فياكله جمب حاجات تانية زي انه يقطع عليه فلفل وطماطم، أو يقطع عليه فراخ أو ياكل جمبه بيض وهكذا.
تعليقات
إرسال تعليق